A l’entschatta ch’el era a Savognin ha Segantini surtut malegià la vita purila e lur lavur e vers la fin da ses otg onns en la vallada ha el creà visiuns da cuntradas nua ch’ils umans n’eran betg pli vi da la lavur, mabain lur preschientscha era expressiun da l’atmosfera da la natira.

Baba ch’aveva dentant 18 onns, stat sco pastura sin l’alp Tussagn sur Savognin e guarda vers il sulegl, davos ella il Piz Toissa. 

Sco sin tut ils maletgs nua ch’ella è da vesair sco figura entira, porta ella er qua il vestgì blau en taila da launa e chalzers grevs. Sch’ella era da vesair en maletgs da pli baud sco model en mez la cuntrada purila sch’è la modella Baba ussa creschida or da quellas scenas. Be il vestgì blau regorda anc a sia derivanza.

Il maletg “Mittag in den Alpen” è svelt daventà il maletg favurì dal public, uschia che Segantini ha fatg in onn pli tard ina segunda versiun da Baba sco pastura. Grazia a la tecnica da divisiunissem èsi gartegià a Segantini da malegiar cuntradas naventadas e cuntradas da stad cun colurs che splenduran en ina moda singulara. Quai ves’ins surtut en ils maletgs “Mittag in den Alpen”. 

Las preschentaziuns èn però differentas. Surtut la figura da Baba è tut autra. Schluccada, quasi lasciva sa posa ella encunter ina planta crudada. Qua è ella en ina posiziun calma cun fidanza en sai,  envers la posiziun plain spetgas da l’emprima versiun. Baba guarda en ils egls dal contemplader.

Il mais d’avust dal 1894 va Segantini cun sia famiglia a Malögia a la tschertga d’ina glisch anc pli clera e pura. Er debits dessan avair giugà ina rolla per sia partenza da Savognin. Adina puspè devi er famas ch’el haja ina relaziun cun Baba e saja vegnì stgatschà pervia da quai. Tuttas duas reproschas na pon betg vegnir verifitgadas. En mintga cas, ha el puspè gì contact cun Peterelli a Savognin, perquai che sco persuna senza naziunalitad ha el gì problems cun ils “Landjäger”. Da Peterelli spetgava el agid, damai ch’el era ina persuna cun influenza en l’administraziun chantunala a Cuira. El, sco er autras famiglias impurtantas da Savognin, l’avevan gidà gia pli baud.

L’atun dal 1899 lavura Giovanni Segantini sin il Munt la bês-cha (Schafberg)  sur Puntraschigna vi da la finiziun dal “Alpentriptychon”. Baba sco modella è strusch pli d’enconuscher. Ella è mo pli ina figura a l’ur.

Il mez da settember vegn Segantini malsaun, el patescha d’ina inflammaziun dal pellitsch. Dus da ses figls e Baba èn cun el. In transport en la vallada n’è betg pli stà pussaivel, Segantini aveva ignorà memia ditg sias dolurs ed era restà sin il Munt da la bês-cha. El mora ils 28 da settember dal 1899.

Cura che Segantini è mort aveva Baba 26 onns ed ella è restada anc tschintg onns tar Bice ed ils uffants fin ch’els n’han betg pli gì daners da pajar ella. Baba marida il 1905 Tgasper Spinatsch, ch’aveva gia in uffant da trais onns cun num Franz. Tgasper era da Savognin, sia dunna Tena (naschida Pool), è morta da la naschientscha da Franz. Ella era la sora da Meia, ch’era la dunna da Gultier Uffer, frar da Baba. Ins po supponer che la letg da Baba e Tgasper saja vegnida arranschada en famiglia. Savognin aveva da quel temp circa 450 abitants, probablamain s’enconuschevan Tgasper e Baba gia dapi lur uffanza.

Il pèr viva a l’entschatta a Kreuzlingen. Tgasper e Baba survegnan trais uffants: Franzisca (1906), Peter (1908) e Margarita (1910). En famiglia valeva Baba sco  ina fitg buna madrigna che na fascheva nagina differenza tranter Franz e ses agens uffants. Pli tard è la famiglia ida a star a Teufen (chantun da Turitg) a la fin a Son Gagl, nua che Baba cusiva scussals. La lavur era dira e mal pajada. A l’entschatta dal 20avel tschientaner era Son Gagl in centrum da textilias. I deva bleras manufacturas da scussals, la pli enconuschenta è l’affar ch’exista oz sut il num Akris.

En la famiglia Spinatsch-Uffer vegniva discurri rumantsch. Ils uffants da Baba han passentà bleras stads tar lur parents a Savognin. La famiglia da Margarita ha gì blers onns ina chasa da vacanzas a Savognin e tgirava ils contacts cun las famiglias Uffer. Er Franz, l’emprim figl da Tgasper era bler tar las famiglias a Savognin.

Cun la famiglia Segantini è Baba restada en contact durant sia entira vita. Mintg’onn, il di da la mort da Segantini, laschava ella metter flurs sin sia fossa a Malögia. Bleras brevs documenteschan la relaziun cordiala tranter Baba e la famiglia Segantini. 

Barbara Maria Spinatsch-Uffer è morta ils 26 da settember dal 1935 en la vegliadetgna da 62 onns. Er Bice Segantini è stada preschenta al funeral.