„Sie war klug und fromm und lernte bald neben den häuslichen Arbeiten, die ihr anvertraut waren, das Leben, das um sie war, in ihr Herz aufzunehmen.“ 

Bianca Segantini in der Bündner Zeitung vom 5. Oktober 1935


„Ihre ungekünstelte Gelassenheit scheint unmittelbar jener reinen Bergwelt zu entspringen, die Mensch, Tier und Natur in einem friedlichen Neben- und Miteinander vereint.“

Erika Lozza Pasquier in Terra Grischuna 1999

Dentant ch’en la part sanestra dal maletg ves’ins ina vatga che maglia e ses vadè che schai per terra, stat Baba sco mamma cun l’uffant che dorma en ses bratsch en il center dal maletg. Mamma e vatga furman in’armonia.  Là nua ch’ils mauns da la mamma sa chattan è la part la pli clera dal maletg. La mamma porta in anè dad aur.

Segantini viveva ensemen cun Bice, però perquai ch’el era senza naziunalitad n’ha el betg pudì maridar ella. Per blers da Savognin era quai ina furma da partenadi nunenconuschenta, schebain ch’els han acceptà quai.

Era ses pensar sur da la religiun era different da quel dals abitants e las abitantas da Savognin. Segantini na gieva mai en baselgia. Per el era Dieu part da la natira e la relaziun cun Dieu ina relaziun fitg persunala. Baba perencunter vegn descritta sco persuna fitg pietusa, ella gieva regularmain a messa, quai ch’era da quel temp usità. La messa da la damaun era chaussa dal mintgadi. Ella ha acceptà la spiritualitad da Segantini sco quai ch’ella era e na giuditgava betg lasura.

Er ses antenats eran plitost pragmatics en fatgs religius. Cura ch’ils perdavants da Baba vivevan en il 18avel tschientaner en Avras ch’era refurmà, eran els refurmads. Igl è da supponer ch’en il Tirol, danunder ch’els vegnivan oriundamain, sajan els stads catolics, quai ch’els èn puspè daventads a Savognin. Ses agens uffants ha Baba educà tenor la cretta catolica.

Segantini enconuscheva bain Baba e sia fisionomia ed ha malegià ella en blers maletgs che mussan la vita purila. El era fascinà da la vita simpla ed oriunda dals purs da Savognin. Savognin era da lez temp in vitg pover. La vita signurila da Segantini era differenta. La cultura da Savognin era il chant e betg l’art da Segantini. 

Segantini ha gì success gia durant ch’el viveva. El gudagnava bain e n’aveva, perquai ch’el era senza naziunalitad, da pajar nagina taglia. El abitava cun sia famiglia en ina chasa dal stil classicistic tardiv, in stil tipic per immigrants grischuns. Quella chasa correspundeva a Segantini che metteva paisa sin ina buna represchentaziun. El aveva procurà per mobiglia preziusa. Ses quinà era il dissegnader da mobiglia Carlo Bugatti. Ils uffants da Segantini vegnivan instruids da scolasts privats.

Tar ils purs e mastergnants aveva el però savens debits. Ina giada ch’ina dunna da Savognin l’aveva supplitgà da pajar ils debits, per ch’ella possia cumprar da mangiar per sia famiglia, aveva Segantini offrì ad ella in maletg. Ella ha refusà schend che cun in maletg na sappia ella betg dustar la fom.