Baba era il segund uffant da Peder Josephus Uffer  e da sia dunna Margarita Maria Bossi.

Tard ha Peder cumenzà a leger, sco uffant è el stà be trais dis a scola. El ha gì da tgirar la biestga, lavurar sco famegl ed el è stà al Schuob. Peder ha emprendì da lainari, ed è sa spezialisà sin travs. El duess perfin avair furnì talas per l’hotel Palace da Malögia. Tranter stagiun lavurava el tar la famiglia Peterelli, nua che Margarita era cuschiniera. Il 1871 maridan els e survegnan set uffants. Peder è mort il 1896 cun 55 onns en l’Inselspital a Berna. In onn avant era sia figlia Baba ida cun la famiglia Segantini a Malögia. 

Baba aveva 14 onns cura ch’ella è stada l’emprima giada model per Segantini. El ha malegià ella sco «Bündnerin am Brunnen». Era sche la fatscha da Baba è d’enconuscher sin blers maletgs, na vuleva Segantini mai purtretar propi ella.  Baba era per el ina figura grischuna tipica ed ideala, ch’el ha pudì inscenar sco pura e pastura. Sin ils maletgs allegorics da Segantini manca Baba.

La relaziun tranter Baba e Segantini era differenta da las relaziuns classicas tranter l’artist e la musa. Gia dapi l’antica cartev’ins che ideas na sa sviluppeschan betg da sasezzas, mabain ch’ellas vegnan creadas da musas. Baba n’è betg stada la musa ch’ha inspirà Segantini. La musa da Segantini era la natira. En quella ha el chattà las respostas sin dumondas dal senn. La tschertga da la glisch e da la natira han sveglià sia creativitad. Baba è stada en las rollas d’ina persuna da la vita purila ed ella sezza sco persuna è svanida.

Dentant che Segantini malegiava e Baba steva model, prelegeva Bice savens. Tranter auter istorgias da Charles Dickens, George Sand u Zola. Segantini n’era mai stà a scola ed ha emprendì pir durant ses temp a l’academia da leger e da scriver. Sia uffanza è stada povra e senza scolaziun, el ha gì da renunziar a bler. 

 Ils 15 da schaner 1858 è el naschì ad Arco, ch’appartegneva da quel temp al Tirol austriac. Cura ch’el aveva set onns è sia mamma morta, ses bab ch’era dependent d’alcohol ha tramess Giovanni a Milaun tar sia mesa sora. Quella lavurava e n’ha betg pudì s’occupar dad el. In onn pli tard è er il bab mort. Suenter che Giovanni è ì a finir sin las vias da Milaun, è vegnì tschiffà e puspè scappà han ins mess el en ina chasa da correcziun. Là è ses talent da malegiar vegnì scuvert per l’emprima giada.

Ils onns a l’academia a Brera davent dal 1875 èn stads impurtants ed a la fin è naschì il 1879 il maletg “Der Chor von St. Antonio”. La glisch en quel maletg era impressiunanta e singulara ed uschia han ils gallarists Alberto e Vittore Grubicy fatg in contract cun Segantini. Il medem onn ha el emprendì a conuscher Bice. El aveva renunzià sin ses vischinadi austriac, però n’ha el betg dumandà il vischinadi talian per betg stuair far militar e perquai ch’el aveva empermess a Bice, ch’el – sco artist – na prendia mai en maun in’arma. Uschia è el restà per vita duranta senza naziunalitad ed ha perquai mai pudì maridar Bice. 

Suenter tschintg onns en la Brianza arriva Segantini cun sia famiglia a Savognin, nua ch’el sviluppescha sia atgna tecnica da malegiar divisiunistica. Avant che Segantini ha meglierà quel stil da malegiar a Savognin eran sias ovras pli stgiras. La glisch clera dal Surses l’ha sfurzà da midar ses stil da malegiar. Cun stritgs fins da penel stritgava el las colurs fundamentalas dasper las colurs cumplementaras directamain sin la taila, senza las maschadar avant sin la paletta. Sin plirs maletgs ha el stritgà enfin 17 rasadas da colur cun stritgs da penel fitg fins ch’el metteva l’in sper l’auter. Savens na spetgava el betg che las rasadas vegnan sitgas, uschia che quellas sa maschadavan sin la taila. Ils stritgs da penel daventan in’unitad. Cun quella maniera divisiunistica da malegiar è el vegnì da tschiffar las colurs splendurantas e l’aria pura da la muntogna. 

I capitava che Segantini midava pli tard ses maletgs. “Heuernte” aveva oriundamain  in auter format. Baba ch’è stada model sco pura che steva davant giu e lavurava, è stada il punct central d’in maletg rectangular. A Malögia ha Segantini agiuntà sin l’ur sisum ina taila dad 80 cm. largezza, uschia ch’il maletg è quasi daventà quadratic. Uschia è la pura daventada il tema secundar ed il tschiel il tema principal. 

En “Rückkehr vom Wald” tira ina dunna ina schlieusa cun in immens tschep e roma. Istorichers d’art interpreteschan quai savens sco il davos tschancun da la vita d’in uman sin via vers la mort. Qua ves’ins Baba sco dunna veglia, schebain ch’ella aveva da quel temp mo 17 onns.