Barbara Maria Uffer è naschida ils 26 da settember 1873 a Savognin, ella è creschida si en il quartier da s.Mitgel e vegniva numnada Baba. Cun 13 onns ha ella cumenzà a lavurar en l’hotel Pianta.

L’atun dal 1886 eran Giovanni Segantini e sia partenaria Bice Bugatti sin via en la chavorgia da la Viamala ed han passentà la notg a Savognin. La glisch en la vallada splendurava ed ha fascinà Segantini. El ha decidì da restar. Trais mais ha el abità en l’hotel Pianta, suenter ha el prendi dimora cun Bice e lur quatter uffants en la chasa Peterelli. Baba è vegnida engaschada sco gidantra en chasa e per tgirar ils uffants; ed ella è daventada il model da Giovanni Segantini

Segantini è daventà renumà anc durant ch’el viveva e ses maletgs tutgavan da lez temp tar las ovras d’art las pli charas e custaivlas dal mund. A Savognin èn naschidas bleras da las pli impurtantas ovras da Segantini, sin bleras è Baba Uffer la modella. Ins na po betg raquintar l’istorgia da la vita da Baba senza la famiglia Segantini. 19 onns ha ella lavurà e vivì cun ils Segantinis. A ses agens uffants na raquintava ella betg paraulas, mabain sur dal temp ch’ella accumpagnava Segantini cura ch’el malegiava.